Naghi-usa ang COMELEC-AFP-PNP, kauban ang mga stakeholder ug uban pang mga ahensya sa gobyerno sa gihimong Maguindanao del Norte–Provincial Joint Security Control Center (MDN-PJSCC) Coordinating Conference aron palig-onon ang koordinasyon sa seguridad ug pagpangandam alang sa 1st Bangsamoro Autonomous Region for Muslim Mindanao (BARMM) Parliamentary Elections niadtong Agosto 19, 2026 sa Cotabato City.
Gipangulohan ni Atty. Mohammad Nabil M. Mutia, Provincial Election Supervisor sa Maguindanao del Norte, uban sila Brig. Gen. Ricky P. Bunayog, Acting Commander sa 6th Infantry Division/Joint Task Force Central; Brig. Gen. Gremel B. Brual, Commander sa 601st Infantry (UNIFIER) Brigade; Col. Romeo N. Bautista III, Acting Commander sa 602nd Infantry (Liberator) Brigade; Lt. Col. Ronaldo M. Tarrayo, Commanding Officer sa 57th Infantry “Masikap” Battalion (57IB); Police Colonel George Bagundol, Provincial Director sa Maguindanao del Norte Police Provincial Office; ug mga miyembro sa PJSCC gikan sa mga munisipyo sa Maguindanao del Norte.
Gihisgutan sa maong conference ang mga isyu ug kabalaka bahin sa seguridad, operational coordination, mga lakang nga kinahanglan ipatuman, ug mga contingency measures aron matubag ang posibleng mga hagit sa dili pa, panahon sa, ug human sa eleksyon.
Gipasiugda sa kalihokan ang importansya sa suod nga kooperasyon tali sa mga stakeholder aron mapadayon ang malinawon, hapsay, ug luwas nga kahimtang alang sa mga botante, election personnel, ug uban pang importanteng kauban sa proseso sa eleksyon.
Pinaagi sa mas lig-on nga koordinasyon ug hiniusang pagplano sa seguridad, tumong sa Maguindanao del Norte–Provincial Joint Security Control Center nga masiguro nga ang tanang kalihokan nga may kalabotan sa eleksyon sulod sa ilang area of responsibility ipahigayon sa luwas, hapsay, ug malinawon nga paagi.