Gipahigayon ang Inter-Agency Operations Exercise para sa paspas nga pagtubag sa kalamidad sa Kalanganan 2, Cotabato City ug sa Bongo Island, Parang, Maguindanao del Norte, uban ang partisipasyon sa nagkalain-laing ahensya sa Bangsamoro Autonomous Region in Muslim Mindanao (BARMM) karung adlawa, Huwebes, Agosto 20, 2026.
Tumong sa maong ehersisyo nga mapalambo ang hiniusang paglihok, pagdumala sa panahon sa krisis, pagbakwit sa mga residente, ug Humanitarian Assistance and Disaster Response (HADR).
Kabahin usab sa tumong sa kalihokan ang pagsusi ug pagpalambo sa mga kasamtangang contingency plan sa gobyerno aron sayo pa lang matino ug masulbad ang mga kakulangon sa koordinasyon ug operasyon sa dili pa moabot ang tinuod nga krisis o kalamidad.
Isip kabahin sa ehersisyo, ipahigayon usab ang Non-Combatant Evacuation Operation (NEO) pinaagi sa usa ka simulated scenario. Pinaagi niini, maanad ang mga hingtungdan sa luwas, hapsay, ug organisadong paglikas ug pagpanalipod sa mga sibilyan.
Sulayan usab pinaagi sa ehersisyo ang kapasidad sa mga partisipante sa paspas nga pagtubag, paglikas, pagbantay sa kadagatan, hapsay nga koordinasyon, ug dali nga pagbinayloay sa impormasyon panahon sa krisis.
Lakip sa mga partisipanteng ahensya ang Joint Task Force Central (JTFC), BARMM READI, Office of Civil Defense-BARMM, MSSD, MOH, BICTO, mga LGU ug DRRMO, Police Regional Office BARMM, Philippine Coast Guard, Bureau of Fire Protection, ug uban pang sangay sa gobyerno.
Pinaagi sa ingon nga mga hiniusang pagbansay, gilauman nga mas mapalig-on ang kapasidad sa mga ahensya sa gobyerno sa paghatag og mas paspas, hapsay, ug epektibong tabang ug proteksyon sa mga pamilya sa rehiyon panahon sa kalamidad o uban pang emergency.