Pormal nang gi-ablihan ang bag-ong Malaybalay City Trial Court (MCTC) nga nahimutang sa Old City Hall, Barangay 1, Malaybalay City, Bukidnon isip kabahin sa mga paningkamot aron mapalambo ang paghatag og hustisya ug serbisyo sa mga residente sa siyudad karung adlawa Setyembre 1, 2026.
Personal nga mitambong sa inauguration ceremony si Malaybalay City Mayor Atty. Jay Warren R. Pabillaran, uban sa mga miyembro sa 10th Sangguniang Panlungsod (SP) nga gipangulohan ni Vice Mayor Estelito “Litoy” Marabe.
Nahimong dinapit nga bisita sa maong seremonya si Hon. Japar B. Dimaampao, Associate Justice sa Supreme Court, nga miduyog sa mga lokal nga opisyal ug uban pang stakeholders sa pormal nga pag-abli sa bag-ong pasilidad. Ang pag-abli sa bag-ong court facility nagtimaan sa dugang nga suporta alang sa judicial services sa Malaybalay City.
Gilauman nga ang mas hapsay ug angay nga pasilidad makatabang sa mga personnel sa korte sa ilang adlaw-adlaw nga buluhaton, ingon man sa mga litigants, abogado, ug mga sakop sa publiko nga nagkinahanglan og serbisyo sa korte.
Dugang pa, ang bag-ong gambalay gitumong nga makahatag og mas komportable ug organisadong lugar alang sa mga hearing, court proceedings, ug uban pang kalihokan nga may kalabotan sa pagdumala sa mga kaso.
Pinaagi sa maong pasilidad, gilauman nga mas mapalambo ang kahapsay ug episyente nga pagproseso sa mga kaso, ilabi na alang sa mga residente sa Malaybalay City nga nagkinahanglan og access sa judicial services.
Ang pag-abli sa bag-ong Malaybalay City Trial Court nagpakita usab sa padayon nga paningkamot sa lokal nga pangagamhanan ug sa hudikatura sa pagpalig-on sa mga pasilidad ug mekanismo nga nagsuporta sa access to justice, maayong pagdumala, ug episyenteng paghatag og serbisyo publiko.