Nagpadayon ang 3rd Career Expo 2026 sa paghatag og higayon sa mga estudyante nga masayran ang nagkalain-laing career path atol sa ikaduhang adlaw sa Career Expo sa Robinsons Place Tagum niadtong Setyembre 4, 2026.
Personal nga mipakita sa ilang suporta sa maong kalihokan si Congressman Oyo Uy, nga girepresentahan sa iyang Political Officer nga si Silvino Matobato Jr., DepEd Tagum City Division Youth Formation Program Coordinator Daisy P. Delfino, Tagum City Councilor Ciara Uy-Salazar, ug Robinsons Tagum Mall Manager Kaye Kaule, nga mga major partner sa maong kalihokan.
Gisugdan ang ikaduhang adlaw pinaagi sa Career Talk ubos sa temang “Ready for What’s Next: Building a Resilient Career Mindset,” nga gipaambit ni DOLE XI Senior Labor and Employment Officer Marlito D. Ayala, diin iyang gihisgutan ang kamahinungdanon sa maayong pagpili sa career path human sa Senior High School.
Aduna usab booth hopping nga naghatag sa mga estudyante og dugang nga higayon nga makaila sa nagkalain-laing eskwelahan, kurso, ug career choices nga ilang mahimong pilion. Gipahigayon usab ang Singing and Songwriting Competition, diin misalmot ang mga estudyante gikan sa nagkalain-laing tulunghaan sa siyudad.
Sa iyang mensahe, mipasalamat si Tagum City Public Employment Services and Capability Development Office Department Head Mae-Ann M. Ang sa dakong suporta nga gihatag sa tanang partners, school exhibitors, ug mga eskwelahan sa siyudad nga adunay Senior High School.
Sa kinatibuk-an, 2,733 ka mga estudyante ang misalmot sa duha ka adlaw nga 3rd Career Expo 2026, nga naghatag kanila og dugang nga impormasyon ug higayon aron mas maandam sa ilang kaugmaon.