Gipusil ang usa ka barangay kagawad samtang nagkakape sa usa ka restaurant sa Barangay Baka, Datu Odin Sinsuat, Maguindanao del Norte, niining buntaga.
Nasamdan sa insidente si Rusman Agar Pinguiaman, 33 anyos, minyo ug kasamtangang barangay kagawad sa Barangay Baka.
Base sa inisyal nga report sa Datu Odin Sinsuat Municipal Police Station, alas-11:40 sa buntag dihang kalit nga gipusil sa duha ka lalaki nga nagsakay og motorsiklo ang biktima.
Naigo sa dughan si Pinguiaman ug daling gidala sa Cotabato Regional Medical Center aron matambalan.
Human sa pagpamusil, dali nga mikalagiw ang mga suspek sakay sa motorsiklo. Usa kanila nailhan sa alyas nga “Bons,” samtang wala pa mailhi ang iyang kauban.
Gipahigayon dayon sa mga kapulisan sa Datu Odin Sinsuat Municipal Police Station ang hot pursuit operation batok sa mga suspek.
Padayon ang imbestigasyon sa kapulisan aron matino ang motibo sa pagpamusil ug madakpan ang mga responsable sa insidente.
Source: StarFM Cotabato