Misailalom sa training ang mga miyembro sa Barangay Peacekeeping Action Team (BPATs) gikan sa 17 ka barangay sa Isulan atol sa gipahigayong pagbansay sa Municipal Gymnasium niadtong Setyembre 26, 2026.
Tumong sa training nga madugangan ang kahibalo, kahanas, ug kahandam sa mga BPAT sa pag-atubang sa mga isyu kalabot sa kalinaw ug kahapsay, ingon man sa mga emerhensiya sa ilang tagsa-tagsa ka barangay.
Niapil sa kalihokan si Vice Mayor Arnold Armada, kauban ang mga miyembro sa Sangguniang Bayan, mga opisyal ug kawani sa lokal nga pangagamhanan, mga barangay official, ug mga miyembro sa BPATs.
Mipaambit sa ilang kahibalo ug kasinatian isip mga resource person ang mga representante sa Isulan Municipal Police Station, Isulan Central Fire Station, 1st Explosive Ordnance Disposal (EOD) Platoon sa Philippine Army, ug Bureau of Fire Protection.
Gipasiugda sa maong kalihokan ang importansya sa padayong pagbansay ug pagpangandam aron mas maandam ang mga BPAT isip katuwang sa mga awtoridad sa pagmintinar sa kalinaw, kahapsay, ug kaluwasan sa komunidad.
Pinaagi sa maong pagbansay, gilauman nga mas andam ang mga BPATs sa hustong pagtubag sa nagkalain-laing insidente ug emergency sa ilang mga barangay.