Nasakmit ang ana-a sa P625,000.00 nga kantidad sa gitoohang mineral ores atol sa checkpoint operation nga gipahigayon sa mga otoridad sa Barangay Mamagum, Sultan Naga Dimaporo, Lanao del Norte niadtong sayo sa kabuntagon sa Setyembre 27, 2026.
Nahibal-an nga nadakpan ang usa ka 32-anyos nga drayber ug tulo niini ka kauban nga nagsakay sa usa ka dump truck nga adunay gibanabanang 6.25 metric tons nga karga sa mga gitoohan nga mineral ores.
Nakit-an usab nga nakalapas ang mga suspek sa balaod-trapiko tungod sa paggamit og improvised plate number sa maong dump truck.
Nagpakita sa padayong paningkamot sa PNP Lanao del Norte batok sa iligal nga pagbaligya ug pagtransport sa mga mineral resources. Ang maong operasyon nagpasiugda usab sa kamahinungdanon sa estrikto nga pagpatuman sa balaod aron mapanalipdan ang natural nga kahinguhaan sa nasud ug mapugngan ang mga kalapasan nga mahimong makadaot sa kalikupan ug sa komunidad.