Nausab ang labing menos 10 ka sundalo human giambush ang usa ka military convoy sa Barangay Badja, Tipo-Tipo, Basilan niadtong Lunes sa buntag. Ang convoy gilangkuban sa tulo ka military truck ug tulo ka civilian vehicle nga nagbiyahe gikan sa Tipo-Tipo padulong sa Lamitan City sa dihang giatake sa wala pa mailhing mga armadong suspek.
Sumala sa Philippine Army, ang convoy gikan sa 45th Infantry Battalion ug padulong sa headquarters sa 1101st Infantry “Gagandilan” Brigade sa Tabiawan, Isabela City. Base sa report sa Police Regional Office-Bangsamoro Autonomous Region (PRO-BAR), ang pag-atake gituohang usa ka retaliatory act nga gi-orchestrate sa usa ka armadong grupo nga giingong ubos sa liderato ni Saddam Siddick. Gikonektar kini sa miaging operasyon sa militar sa Barangay Baimbing, Lamitan City, diin namatay ang ikaduhang asawa ni Siddick nga si Nermalyn Salapuddin Musa.
Samtang padayon pa ang imbestigasyon sa insidente, gihatagan dayon og medical treatment ang mga nasamdan nga sundalo sa Lamitan City. Gipadayon usab sa Philippine Army ang pursuit operations aron madakop ang mga responsable sa pag-atake. Giingon ni Army spokesperson Col. Louie Dema-ala nga dili tugotan ang bisan unsang matang sa kapintasan ug ang mga responsable kinahanglan manubag subay sa balaod.