BUTUAN CITY – Patay nang napalgan ang tulo ka mga empleyado sa usa ka hotel sa Davao City, lakip ang usa ka engineer, human sila napalgan sulod sa sewage treatment plant sa hotel nga ilang gitrabahuan.
Gi-ila ang mga biktima nga sila Engr Reuben James Ramos, 30 anyos; Rextal Banal, 27 anyos; ug Lance Molijon, 26 anyos, pulos miyembro sa engineering team ug mga empleyado sa Dusit Thani residence sa Davao City.
Base sa inisyal nga imbestigasyon sa kapulisan, nag-ayo ang tulo sa sewage treatment facility sa hotel niadtong Lunes, Oktubre 5,
Unang gitu-uhan nga nakuryentihan ang mga biktima, apan sumala sa mga awtoridad hangtud nga gibutyag sa Davao City Fire District-Bureau of Fire Protection nga nakit-an nila ang delikadong lebel sa carbon monoxide sulod sa maong planta human makadawat og report bahin sa posibleng pagtulo sa gas sa maong dapit pasado alas-2:36 sa kaadlawon sa maong adlaw.
Tungod niini, usa sa mga anggulong gisusi sa mga imbestigador ang gas poisoning apan gisusi usab kung nakuryentihan ba sila atol sa ilang pagtrabaho sa maong pasilidad.
Sumala sa Davao City Police Office, padayon ang ilang lawom nga imbestigasyon samtang gihulat ang resulta sa otopsiya aron matino ang insaktong hinungdan sa pagkamatay sa mga biktima.
Source: Bombo Radyo Butuan