Misaad si Nazareth Punong Barangay Atty. Regine Rodriguez nga padayon ang paghatag og tabang sa mga pamilyang nabiktima sa sunog sa 9th-21st Street nga miresulta sa pagkamatay sa duha ka tawo niadtong miaging adlaw.
Gipahayag sa kapitana nga ihatag sa lokal nga panggamhanan ang tanang gikinahanglang suporta gikan sa Quick Response Fund (QRF), sa iyang personal nga pondo, ug sa opisina ni Congressman Rufus Rodriguez.
Giklaro ni Rodriguez nga gawas sa pag-asikaso sa libreng autopsy sa duha ka namatay, motabang usab ang konseho sa barangay sa tanang panginahanglan sa mga pamilya hangtod sa pagbalhin sa mga biktima ngadto sa ilang gipiling punerarya.
Dugang pa sa opisyal, magpadayon ang iyang opisina sa pagmonitor sa kahimtang ug paghatag og seguridad sa tanang pamilyang nawadan og puy-anan tungod sa maong trahedya.
Source: Bombo Radyo CDO