Grabeng nasamdan ang usa ka 35-anyos nga trabahante human mibuto ang usa ka tangke sa oxygen sa usa ka pinuy-anan sa Purok 8, Barangay Poblacion, Tacurong City, alas-11:20 sa buntag niadtong Oktubre 14, 2026.
Base sa inisyal nga imbestigasyon sa kapulisan, ang biktima nga giila lamang sa alyas nga Ben, usa ka laborer o helper ug residente sa Barangay Kenram, Isulan, Sultan Kudarat. Giingong nag-refill siya og tangke sa oxygen sa dihang kalit kini nga mibuto.
Tungod sa kakusog sa pagbuto, naputol ang tuo nga bitiis sa biktima. Gidala dayon siya sa Tacurong Doctors Hospital aron matambalan.
Mitubag usab sa insidente ang mga sakop sa Tacurong City Police Station. Gipangayo usab ang tabang sa Bureau of Fire Protection (BFP) ug PNP Sultan Kudarat Provincial Explosives and Canine Unit aron susihon ang lugar ug mahibal-an ang posibleng hinungdan sa pagbuto.
Padayon pang giimbestigahan sa mga awtoridad ang insidente aron matino ang eksaktong hinungdan sa pagbuto.
Source: StarFM Cotabato