Upat ka indibidwal, lakip ang usa ka babaye, ang nadakpan human nasakmit gikan kanila ang gibanabanang P1.03 milyong kantidad sa gidudahang shabu atol sa buy-bust operation sa Barangay Rizal Poblacion, Banga, South Cotabato niadtong Sabado, Oktubre 17.
Gipangulohan sa Philippine Drug Enforcement Agency (PDEA)-12 Regional Special Enforcement Team ang operasyon, kauban ang PDEA South Cotabato ug Philippine Army.
Giila ang mga nadakpan sa ilang mga alyas nga Kim, 26; Van, 33; Ar-Ar, 21; ug Mar, 26, nga mga residente sa maong lugar.
Gibanabanang 151.8 gramos sa gidudahang shabu nga nagkantidad og P1,032,240 ang nasakmit sa operasyon.
Narekober usab sa mga operatiba ang P1,000 nga marked money, 69 ka piraso sa boodle money, cellphone, sling bag, timbangan, ug usa ka traysikol.
Anaa karon sa kustodiya sa PDEA-12 ang upat ka suspek samtang giandam ang mga kaso batok kanila tungod sa paglapas sa Sections 5 ug 11 sa Republic Act No. 9165 o Comprehensive Dangerous Drugs Act of 2002, nga may kalabotan sa pagbaligya ug ilegal nga pagpanag-iya sa delikadong droga.
Source: StarFM Cotabato