Nasakmit sa Police Regional Office 10 ang gituohang smuggled cigarettes nga nagkantidad og P2.6 milyon ug nadakpan ang tulo ka indibidwal sa duha ka bulag nga operasyon sa Lanao del Norte ug Misamis Oriental niadtong milabay’ng adlaw.
Unang nasikop sa checkpoint sa Barangay Samburon, Linamon, Lanao del Norte ang 19-anyos nga drayber sa Nissan Navara pickup truck nga giila sa alyas nga “Amor,” residente sa Iligan City.
Nakasakmit usa ang mga otoridad og 250 ka ream sa Bosqu cigarettes nga nagkantidad og P200,000 human kini madiskubrehan sulod sa usa ka tagoang compartment sa sakyanan nga padulong unta sa Iligan City.
Samtang, alas 3:35 sa kaadlawon niadtong Oktubre 23, duha pa ka drayber ang nadakpan sa hiniusang checkpoint operation sa Barangay San Pedro, Initao, Misamis Oriental. Giila sila sa alyas nga “Ar-Ar,” 41 anyos, residente sa Pantao Ragat, ug “Mail,” 45 anyos, residente sa Baloi, Lanao del Norte.
Nasakmit gikan sa Toyota Avanza ug Toyota Innova nga ilang gimaneho ang 3,000 ka ream sa Cannon 100’s green cigarettes nga nagkantidad og P2.4 milyon. Gikan sa Baloi, Lanao del Norte, ang mga sakyanan ug padulong matud pa sa Puerto, Cagayan de Oro City.
Ang mga operasyon gihimo sa mga personahe sa nagkadaiyang police units isip kabahin sa kampanya batok sa pagpamaligya ug pagbiyahe sa mga kontrabando nga sigarilyo.
Source: Bombo Radyo Bukidnon