Padayon ang imbestigasyon sa kapulisan sa lungsod sa Talacogon, Agusan del Sur, kalabot sa pagpamusil pasado alas-2 sa kaadlawon karong Sabado sa Purok Anthurium, Barangay San Agustin, nga miresulta sa pagkamatay sa usa ka 15-anyos nga estudyante ug pagkasamad sa duha pa ka tawo.
Giila ang namatay sa alyas nga Franco, residente sa maong barangay, nga gidala pa sa ospital apan gideklarang dead on arrival.
Samtang, giila ang duha ka samaran nga sila si Leah Mea, 23-anyos, residente sa Barangay Coalicion, ug usa ka 13-anyos nga giila sa alyas nga Martin, residente sa Barangay Nuevo. Silang duha lumulupyo sa lungsod sa San Luis, Agusan del Sur, ug padayon pang gitambalan sa maong ospital.
Base sa inisyal nga imbestigasyon sa kapulisan, pauli na unta ang mga biktima human motan-aw og konsiyerto sa dihang nahitabo ang insidente.
Gisusi pa sa kapulisan ang alegasyon nga samtang naglakaw ang mga biktima, ilang gisigawan ug gibato ang mga sakay sa duha ka motorsiklo nga miagi kanila, nga ilang gigukod pa kuno.
Pag-abot sa unahan, didto na nadungog ang mga buto sa armas ug natamaan ang 15-anyos nga si Franco.
Dali nga miabot sa lugar ang inahan sa biktima, apan mihilak na lamang kini human makita ang nahitabo sa iyang anak.
Human sa pagpamusil, mikalagiw ang suspek padulong sa lungsod sa San Luis, Agusan del Sur.
Source: StarFM Cotabato