Gi-report sa Police Regional Office 10 (PRO 10) nga sa kinatibuk-an malinawon ang ika-47 nga Lanzones Festival sa Camiguin, tungod sa hiniusang paningkamot sa seguridad sa mga kapulisan, lokal nga pangagamhanan, mga kaubang ahensiya, ug uban pang hingtungdan sa tibuok pagsaulog.
Gipahigayon gikan Oktubre 18 hangtod 25, 2026, sa Mambajao, Camiguin, ang pista nga gitambongan sa gibana-banang 5,000 ka mga tawo nga miapil ug mitan-aw sa nagkalainlaing kalihokan ug kasadya. Aron maseguro ang kaluwasan sa publiko, nagdeploy ang PRO 10 og 252 ka personahe, nga gilangkuban sa 169 ka pulis ug 83 ka dugang nga personahe gikan sa nagkalainlaing yunit.
Giapil sa mga operasyon sa seguridad ang dagkong kalihokan sa pista ug mga lugar nga daghang tawo ang nagtigom, lakip ang Grand Parade, street dancing, mga pasundayag sa sayaw, Rocktober Night, Mutya sa Buahanan, ug Kalanrakas sa Kabataan. Nagpadayon ang presensiya sa mga kapulisan sa maong mga lugar ug mitabang sila sa mga nanambong aron maseguro ang kaluwasan sa publiko ug ang hapsay nga pagpahigayon sa mga kalihokan.
Usa ka insidente sa pagpangawat pinaagi sa pagbulsa (pickpocketing) ang gitaho niadtong Oktubre 24 sa Congressman Pedro Palarca Romualdo Sports Complex. Dihadiha nga gidakop sa mga pulis nga mitubag sa insidente ang suspetsado ug narekober ang cellphone sa biktima nga gibanabana og bili nga ₱8,000. Gitugyan ang suspetsado ngadto sa Mambajao Municipal Police Station alang sa tukmang pagproseso ug pagsang-at sa angay nga mga kaso.
Gidayeg ni PBGEN NESTOR C BABAGAY, JR., Regional Director sa PRO 10, ang mga personahe ug hingtungdan tungod sa ilang kooperasyon ug dedikasyon sa pagmintinar sa kinatibuk-ang kalinaw ug kahapsay sa pagsaulog.
“Ang kaluwasan sa publiko usa ka responsibilidad sa tanan. Importante kaayo ang lig-on nga koordinasyon tali sa kapulisan, lokal nga pangagamhanan, mga kaubang ahensiya, ug komunidad aron masiguro ang hapsay nga pagpahigayon sa pista,” matod niya.
