Nagbalik-loob sa gobyerno ang upat ka indibidwal nga nailhang Friends Rescued (FRs) human nila itugyan ang ilang mga armas atol sa usa ka seremonyas nga gipahigayon sa opisina sa mayor sulod sa T’boli Municipal Hall, South Cotabato, niadtong Martes, Nobyembre 3.
Gipaila ang upat ka FRs ug ang ilang mga gisurrender nga armas ngadto kang 603rd Infantry Brigade Commander Brigadier General Manuel Leo Q. Gador ug T’boli Mayor Keo Dayle T. Tuan.
Human niini, nanumpa sila sa ilang pagkamaunongon sa gobyerno isip timaan sa ilang pasalig nga talikdan na ang armadong pakigbisog ug magkinabuhi subay sa balaod.
Naghatag usab si Mayor Tuan og inisyal nga pinansyal nga tabang ngadto kanila ug mipasalig nga ipadayon ang suporta ubos sa Enhanced Comprehensive Local Integration Program (E-CLIP).
Gidayeg ni Gador ang ilang desisyon nga pilion ang kalinaw ug giawhag ang ubang nagpabilin sa armadong grupo nga pahimuslan ang oportunidad sa pagbalik-loob sa gobyerno.
Samtang, gipasalig sa 603rd Infantry Brigade nga ipadayon ang pakigtambayayong sa mga lokal nga panggamhanan, mga kaabag sa pagpalambo sa kalinaw, ug mga komunidad aron makab-ot ang malungtarong kalinaw ug kalamboan sa Central Mindanao.
Source: StarFM Cotabato