Giduso sa konseho ang usa ka ordinansa nga magkontrol sa pagbaligya ug pag-resell sa mga over-the-counter (OTC) nga tambal ug uban pang pharmaceutical products sa mga sari-sari store ug susamang establisemento ning dakbayan sa Malaybalay.
Gipresentar ang maong sugyot ni Konsehal Kathleen Cecille Pagaling, Chairman sa Committee on Health, atol sa sesyon niadtong Martes, Nobyembre 3, 2026, diin gilakip usab ang pagpahamtang og silot sa mga establisementong molapas sa ipatuman nga mga lagda.
Dugang pa sa konsehal, dili angay isipon nga ordinaryong baligya ang mga tambal tungod sa posibleng peligro niini sa panglawas kon expired, peke, wala marehistro o dili husto ang pagtipig ug pagdumala.
Gipasabot usab nga gikinahanglan ang tukmang pagtugot gikan sa Food and Drug Administration (FDA) sa dili pa tugotan ang pagbaligya niini.
Apan, aduna matud pay mga panglantaw gikan sa publiko nga nagpunting sa kahinungdanon sa mga sari-sari store, ilabi na sa mga komunidad nga layo sa botika, tungod kay mas sayon ug mas barato alang sa mga residente ang pagpalit og batakang matang sa medisina.
Samtang, gipasabot sa opisyal nga bukas pa sa paghisgot ug paghatag og rekomendasyon sa mga miyembro sa konseho ang maong sugyot-balaodnon.
Source: Bombo Radyo Bukidnon