Gipalig-on sa City Health Office (CHO) sa Valencia City ang ilang pagbantay ug pagresponde sa mga sakit human natala ang mga kaso sa chickenpox ug scabies sa pipila ka barangay ug tulunghaan gikan Oktubre 22.
Base sa report sa CHO niadtong Nobyembre 3, pinaagi sa City Epidemiology and Surveillance Unit o CESU, giimbestigahan ang mga report sa Barangay Kahaponan, Colonia, Poblacion ug Lilingayon.
Natala ang tulo ka gidudahang kaso sa chickenpox sa Kahaponan, samtang 33 ka indibidwal ang gitambalan tungod sa scabies sa Colonia. Gitagaan usab og pag-atiman ang 11 ka Grade 1 pupils sa Poblacion ug 30 ka tinun-an sa Lilingayon.
Gawas sa paghatag og mga tambal ug sulfur soap, nagpahigayon usab ang CHO og health education aron mapahibalo ang publiko sa hustong paglikay sa maong mga sakit.
Giawhag sa mga health personnel ang mga residente, ginikanan ug magtutudlo nga magmintinar sa personal nga kalimpyo, regular nga manglaba sa mga bisti ug dili mag-ambitay sa personal nga mga gamit aron malikayan ang pagtakod ug pagkaylap sa mga sakit sa panit.
Souce: Bombo Radyo Bukidnon