Samdan ang usa ka 37 anyos nga lalaki human kini gipusil sa wala mailhing suspek samtang nagpauli sakay sa motorsiklo sa Purok 4, Barangay Libertad, Quezon, Bukidnon, pasado alas-2:30 sa kaadlawon ning adlaw’ng biyernes, Nobyembre 6, 2026.
Base sa inisyal nga imbestigasyon sa Quezon Municipal Police Station, bag-ohay lamang nahuman ang biktima sa iyang trabaho sa Municipal Government of Quezon ug nagpauli na sakay sa itom nga Yamaha XTZ nga motorsiklo.
Samtang nagbiyahe, gisundan matud pa kini sa wala mailhing motorsiklo ug mihunong duol sa usa ka plantasyon sa tubo, diin gipusil siya og usa ka higayon sa bahin sa atubangang sa liog niini.
Base sa taho sa mga residente sa duol nga lugar, nakadungog sila og duha ka motorsiklo nga misingabot, gisundan sa buto sa pusil, sa wala pa nadungog ang pagpalagyo sa usa niini.
Nakit-an dayon sa mga residente ang biktima nga naghigda sa dalan samtang nagkadugo, hinungdan nga gipahibalo nila ang pamilya niini ug gitawagan ang Quezon Rescue aron mahatagan og dinaliang hinabang.
Gidala ang biktima sa Quezon Health Center Infirmary alang sa medikal nga pagtambal samtang gipadayon sa kapulisan ang imbestigasyon aron mailhan ug madakpan ang responsable sa maong krimen.
Source: Bombo Radyo Bukidnon