Davao City – Patay ang isang 24-anyos na babae matapos masagasaan ng isang wingvan habang ito’y tumatawid sa kalsada sa Km 12, McArthur Highway, Brgy. Dumoy, Toril, Davao City, bandang 9:00 ng gabi nito lamng Hunyo 27, 2023.
Kinilala ng Baliok Police Station ang biktima na si Lyra Martin Marcito, residente ng Saliao Esperanza, Sultan Kudarat at napag-alaman na kakapasa lamang nito sa Medical Technologists Licensure Examination noong Marso 2023.
Ayon sa inisyal na ulat, habang tumatawid ng pedestrian lane ang biktima nang ito’y mahagip ng mabilis na paparating na wingvan at nagresulta sa agarang nitong pagkamatay.
Kinila ang driver na si alyas “Renato”, 51, residente ng Mangagoy, Bislig, Surigao del Sur, salaysay nito na hindi nito napansin na tumatawid ng kalsada ang biktima dahil madilim ang daan at dahil sa malakas din ang ulan.
Humingi naman ito ng paumanhin sa pamilya ng nasawing biktima.
Nahaharap sa kasong Reckless Imprudence Resulting in Homicide ang drayber ng wingvan at nananawagan ang mga awtoridad na mag doble ingat at sumunod sa batas trapiko upang maiwasan ang anumang aksidente sa daan.