Pormal nga gi-ablihan ang bag-ong ruta sa byaheng gikan Cagayan de Oro City nga maghunong sa San Fernando, magpadayon sa Tagum City, ug magtultol paingon sa Mati, Davao Oriental adtong Marso 3, 2025.
Gipangunahan ni Halangdong Mayor Hon. Rogelio “Dodoy” C. Yeke, ang aktibidad ug siya usab ang nanguna sa opisyal nga pag-abli sa operasyon sa RTMI Bus Company sa lungsod.
Ang pag-abli sa bag-ong ruta magahatag og kalipay sa mga residente ug magpaspas sa sistema sa transportasyon, dili lang sa lokal nga komunidad kundi pati na usab sa mga biyahero nga magpadulong sa mga kasikbit nga lugar.
Nagpahigayon usab ug isa ka ritwal kauban ang mga Indigenous People (IPs) para idalit ang pasalamat ug ang pagpangayo sa proteksyon sa mga biyahero ug bus driver aron luwas ang tanan sa aksidente samtang nag biyahe.
Kini nga proyekto usa ka dakong lakang aron mapadali ug mapalambo ang serbisyo sa transportasyon sa rehiyon, nga magsustento sa nagkadako nga panginahanglan sa mga residente ug magahatag og dugang oportunidad para sa negosyo ug turismo.
Ang proyekto nagpamatuod sa dedikasyon sa lokal nga gobyerno ug sa RTMI Bus Company sa paghatag og kalidad nga serbisyo para sa tanan.
