Gipasiugdahan ang unang adlaw sa Gakit Festival 2025 pinaagi sa makapaengganyo ug makasinati’ng Fluvial Parade nga nagtipon sa mga partisipante gikan sa nagkadaiyang sektor sa Dakbayan sa Valencia, Bukidnon, Oktubre 23, 2025.
Ang maong kalihokan nagpasundayag sa makapaanyag nga mga gakit nga may lain-laing disenyo ug tema nga nagrepresentar sa pagkamamugnaon, panaghiusa, ug pagmahal sa lokal nga kultura.
Gibahin ang parade sa tulo ka kategoriya nga nagpakita sa aktibong partisipasyon sa matag sektor sa komunidad.
Category A – Government Offices/Agencies nga naglakip sa Women’s Association, Barangay Council/Liga ng mga Barangay (BCLA), ug Valencia Water District, nga nagpakita sa ilang suporta ug kolaborasyon uban sa lokal nga pangagamhanan.
Category B – Private Companies nga naglakip sa Tamay Lang Corp ug Sumifru Philippines, nga nagpamatuod sa ilang kooperasyon alang sa kalampusan sa festival.
Samtang ang Category C – Family Clan/Organizations nagpasundayag sa partisipasyon sa Ayco Clan, Catarata Clan, Eduave Clan, ug Tumandok HU, nga nagpamatuod sa ilang pagtahud sa kultura ug panaghiusa sa komunidad.
Ang maong kalihokan nagtimaan sa padayon nga paningkamot sa Lokal nga Pangagamhanan sa Valencia, ubos sa liderato ni Mayor Amie Galario, kauban ang 10th Sangguniang Panlungsod nga gipangulohan ni Vice Mayor Greizl Galario-Fernandez, aron mapreserbar ug mapalambu ang lokal nga kultura ug tradisyon samtang gipalig-on ang partisipasyon ug pakig-ambit sa katawhan alang sa padayon nga kalamboan sa Dakbayan sa Valencia.
Nagmalamposon usab ang unang adlaw sa kalihokan pinaagi sa suporta sa Valencia Bukidnon Historical Society nga gipangulohan ni Antonio Alquino; sa City Tourism Office ubos sa pagdumala ni Ma’am Eva Mandaue; sa mga Indigenous Peoples (IPs) nga gipangulohan ni IPMR Bae Irene Pandian; ni Councilor Cecile Mabao-Caballero, Committee Chair on Tourism, Arts and Culture; ni Marie Elaine Unchuan, Regional Director sa Department of Tourism 10; ni Jesnar Dems Torres, Schools Division Superintendent sa DepEd Valencia; uban sa tanang lumilihok, ug mga security ug safety auxiliaries
PIAD l Jay Fernandez-Ara
Photos: Charlotte Rupinta & Ree Diarota