Sikop sa mga otoridad ang usa ka gi-ilang “Amazona” ug medical staff sa New Peoples Army nga nag-atubang sa patong-patong nga kaso sa gihimong operasyon sa Brgy. Bancasi, Butuan City, Agusan del Norte.
Gi-ila ang suspek nga si alyas “Jai,” 26 anyos ug residente sa Purok 1, Brgy. Farmbugas, Claveria, Misamis Oriental ug miyembro sa Medical Unit sa Sandatahang Digma Group Samsung, Guerrilla Front Huawei, Sub-Regional Committee 1 (SR-1), North Central Mindanao Regional Committee (NCMRC) sa New Peoples Army (NPA).
Nahibal-an nga gidakop ang suspek subay sa Warrant of Arrest sa kasong rebelyon ug crimes against humanity ug gitoohan nga konektado kini sa terorismo sa mga lugar sa Claveria, Farmbugas, Lagonglong, Misamis Oriental ug lambigit pud sa pagdaob sa duha ka 10-wheeler truck sa kumpanya sa Del Monte Philippines sa Brgy. Don G. Pelaez, Claveria, Misamis Oriental adtong 2017.
Nagpabilin ang PNP sa hugot ug dasig nga pagsikop sa mga miyembro ug tagasuporta sa PNP nga wala’y laing dala kundili pagbahad sa mga ordinaryong tao, gubot ug terorismo nga ma’oy babag sa pagkabot sa kalinaw ug kalamboan sa atung nasud.