Patay ang gito-ohang Top 10 Most Wanted Person Regional Level nga adunay kasong Murder human nisukol sa kapulisan sa gihimong operasyon sa Barangay Inug-ug, Pikit, Cotabato takna 11:49 sa buntag adtong Lunes, Enero 5, 2026.
Gi-ila ang suspek nga si alyas “Laga” nga gilakag sa kapulisan kay adunay Warrant of Arrest sa kasong Murder nga naay Criminal Case No. 23-345 nga gi-isyu sa 12th Judicial Region, Branch 24 sa Midsayap, North Cotabato adtong Nobyembre 13, 2024 ug wala’y girekomenda nga piyansa.
Narekober gikan sa suspek ang usa ka unit .45 caliber Colt pistol (Serial No. 1453853) ug 10 ka buhi nga bala.
Nahibal-an nga gihatagan pa ang maong suspek ug tiyansa nga mo-surrender sa kapulisan peru nagdumili kini ug gi-bunot niini ang iyang pusil ug giabuthan ang mga pulis hinungdan nga nibalos ang kapulisan ug naka-angkon kini ug samad pinusilan sa iyang lawas, hinungdan sa iyang hinanaling kamatayon.
Padayon ang Pikit PNP sa paglakag sa mga tao nga na’ay mga atraso sa balaod arun mamentinar ang kalinaw ug kalambo-an sa atung dakbayan.