Malampusong napahigayon ang mahinungdanong awareness campaign nga nag-ulohan og “Panalawahig: Public Awareness on Wetlands and Traditional Knowledge” didto sa City Nursery, Hagkol, Barangay Poblacion, Valencia City, Bukidnon adtong Pebrero 5, 2026,
Gisalmutan ang maong kalihokan, nga parte sa pagobserba sa World Wetlands Day, sa nagkadaiyang sektor lakip na ang mga representante sa Indigenous Peoples, academe, ug mga environmental advocates. Tumong niini ang pagpalawom sa pagsabot sa publiko mahitungod sa importansya sa Pulangi River ug ang pagpahiuli sa mga tradisyonal nga ritwal ug kahibalo sa pag-atiman sa tubig.
Kini nga kalihokan nahimong posible ug nagmalampuson tungod sa hugot nga suporta sa Lokal nga Pangamhanan sa Valencia ubos sa liderato ni Mayor Amie Galario kauban ang 10th Sangguniang Panlungsod sa pagpangulo ni Vice Mayor Greizl Galario-Fernandez.
Atol sa programa, gipaambit ni Julius M. Parian, RPF (City ENR Officer) ang kabililhon sa paghiusa sa siyensya ug tradisyon. Nahimong sentro usab sa diskusyon ang:
Pagsabot sa Panalawahig: Diin gipasabot sa mga lider sa IPMR ug Tumandok hu Valencia ang espirituhanong koneksyon sa katawhan ngadto sa tubig.
Kasaysayan ug Kultura: Gipresentar sa Central Mindanao University (CMU) Dept. of History ang mga dokumentadong tradisyon sa tubig sa Bukidnon nga angay ipreserba.
Ang kalampusan sa maong aktibidad usa ka dakong lakang alang sa Valencia City sa pagkab-ot sa usa ka komunidad nga maki-kinaiyahan ug mapasigarbuhon sa iyang kultural nga kabilin.
PIAD | Jay Fernandez-Ara
Photos: Carl Tradz