Ang ikaduhang adlaw sa Himig Handog International Choral Grand Prix Competition nagpadayon sa Herminigildo C. Baloyo, MD Hall isip kabahin sa selebrasyon sa ika-23 nga Musikahan Festival sa Tagum City, Davao del Norte.
Ang kompetisyon naglakip sa tulo ka kategoriya nga mao ang Children’s Category, Youth Category, ug Mixed Category, diin gipakita sa mga partisipante ang ilang kahanas sa pagkanta ug musical interpretation. Gawas sa ilang gipiling free choice piece sa matag entry, adunay usab giandam nga set piece alang sa matag kategoriya.
Alang sa Children’s Category, ang set piece mao ang “Saging Tundan” ni Jude B. Roldan. Sa Youth Category, gipili ang “Requiem Aeternam” ni Arwin Tan, samtang sa Mixed Category, ang “Tubig” ni Ralph Hoffmann ang opisyal nga piyesa nga gihimo sa tanang kalahok.
Naghatag usab og dugang nga excitement sa kompetisyon ang international panel of judges nga gilangkuban nila Dr. Horrace Tantang (Indonesia), Mr. Ralph Hoffmann (Germany), Mr. Ken Steven (Indonesia), Mr. Terence Ling (Malaysia), ug si Dr. Arwin Tan nga gikan sa Pilipinas.
Ang Himig Handog International Choral Grand Prix Competition maoy usa sa mga sentrong kalihokan nga gipahigayon sulod sa tulo ka adlaw, isip kabahin sa usa ka semana nga selebrasyon sa Musikahan sa Tagum 2026, nga nagtumong sa paghatag og oportunidad sa kabatan-onan aron mapalambo ang ilang talento ug mapalig-on ang kultura sa choral music sa rehiyon.