Gisugdan sa City Government of Valencia ang Kick-off Ceremony sa 2026 National Women’s Month Celebration niadtong Marso 5, 2026 sa Valencia City Gym, Bukidnon isip paghatag og bili sa katungod ug kaayohan sa mga kababayen-an.
Bitbit ang tema nga “WE for Gender Equality and Inclusive Society,” gisugdan ang selebrasyon pinaagi sa motorcade nga nagpahibalo sa tibuok dakbayan sa pagsugod sa Women’s Month. Nahimong hapsay ang dagan sa trapiko sa tabang sa mga Traffic Enforcers ug PNP Auxiliary.
Gipahigayon usab ang usa ka programa sa City Gymnasium nga gipasiugda sa Gender and Development (GAD) Office ubos sa pagdumala ni Lourdita Aguirre. Mitambong si Mayor Amie Galario ug gipahayag ang iyang dakong suporta sa mga kababayen-an, diin iyang gipasiugda ang ilang mahinungdanong papel sa komunidad.
Nagpaabot usab og mensahe sa suporta si Vice Mayor Greizl Galario-Fernandez pinaagi sa iyang representante nga si Khirt James Remulta, samtang gipakita usab sa 10th Sangguniang Panlungsod ang ilang lig-on nga suporta sa maong selebrasyon.
Usa sa mga highlight sa kalihokan mao ang oath-taking sa Newly Elected Officers sa Panlibatuhan Women’s Organization gikan sa nagkadaiyang barangay, nga gipangunahan ni Mayor Galario.
Gipahigayon usab ang nagkadaiyang libreng serbisyo sama sa Women’s Bazaar and Expo, legal consultation, family planning, medical check-up, mental health consultation, cervical cancer awareness, vitamins, ug voluntary bloodletting, lakip ang libreng haircut, manicure, pedicure, ug therapeutic massage.
Nahimong posible ang kalihokan pinaagi sa pagtinabangay sa City Health Office, City Civil Registrar’s Office, City Sports Office, Men in Uniform, ug nursing students sa Mountain View College, uban sa suporta sa nagkadaiyang organisasyon, mga empleyado sa lokal nga panggamhanan, ug barangay women’s organizations sa dakbayan.
Pinaagi niini nga selebrasyon, gipakita sa Valencia City ang padayon nga pagpalig-on sa gender equality ug inclusive society pinaagi sa paghatag og bili sa gahum sa matag kababayen-an.
PIAD | Report by Jay Fernandez-Ara
Photos by Carl Tradz