Malampusong gipahigayon ang usa ka benchmarking visit sa mga opisyal ug personahe gikan sa Munisipalidad sa Pigcawayan, Cotabato, kinsa mibisita sa dakbayan sa Valencia niadtong Marso 13, 2026. Tumong sa maong pagbisita nga makakat-on sa mga epektibong pamaagi sa dakbayan sa pagpadagan sa ekonomiya ug turismo.
Ang maong kalihokan gipahigayon didto sa City Mayor’s Conference Room, diin mainitong gi-welcome ang delegasyon nga gilangkuban sa mga miyembro sa Sangguniang Bayan (SB) sa Pigcawayan gikan sa Committee on Trade and Industry ug Committee on Tourism, kauban ang mga staff gikan sa ilang Local Economic Development and Investment Promotion Office (LEDIPO).
Kini nga inisyatibo hugot nga gisuportahan sa lokal nga pangagamhanan sa Valencia ubos sa lig-on nga liderato ni Mayor Amie Galario, kauban ang 10th Sangguniang Panlungsod sa pagpangulo ni Vice Mayor Greizl Galario-Fernandez.
Si Konsehal Mark Anthonee Bernal, ang Chairperson sa Committee on People’s Economic, maoy nanguna sa pag-abi-abi sa mga bisita. Sa iyang pamahayag, iyang gipasiugdahan ang kamahinungdanon sa panaghigalaay ug pagbinayloay og mga ideya tali sa mga Local Government Units (LGUs) aron mas mapalambo pa ang serbisyo sa katawhan.
Ang maong kalihokan malampusong na-organisar pinaagi sa LEDIPO-Valencia ubos sa pagpangulo ni Hollander Hora, sa pakig-alayon sa City Tourism Office ubos sa pagdumala ni Leonor Mandaue. Mitambong usab si Engr. Marlino M. Guerrero gikan sa City Planning and Development Office (CPDO), kinsa mipaambit sa aspeto sa strategic planning sa dakbayan. Isip kabahin sa programa, gipresentar usab ni Mandaue ang nagkalain-laing tourist spots sa dakbayan aron ipakita ang mga garbo sa Valencia ug kon giunsa pagdumala ang turismo isip usa ka dakong haligi sa lokal nga ekonomiya.
Pinaagi sa mga susamang kalihokan, nagpabilin ang Valencia City nga usa ka ehemplo sa kalamboan ug andam kanunay nga mopaambit sa ilang mga best practices ngadto sa uban pang dapit sa Mindanao.
PIAD | Report ni Jay Fernandez-Ara
Photos: Carl Tradz & Ree Diarota