Malampusong gipahigayon sa Lokal nga Panggamhanan sa Valencia ang Monthly Convocation karong adlawa, Hunyo 1, 2026, didto sa City Hall Covered Court nga may temang “Green Enterprise, Clean Environment: Kaabag sa Hapsay, Linaw ug Bibo nga Valencia.”
Ang kalihokan hiniusang gipangulohan sa City Economic Enterprise Office (CEEO) ug City Environment and Natural Resources Office (CENRO) isip kabahin sa padayong paningkamot sa siyudad sa pagpalambo sa lokal nga ekonomiya samtang gipanalipdan ug giatiman ang kinaiyahan.
Personal nga mitambong si Mayor Amie G. Galario ug Vice Mayor Greizl Galario-Fernandez, kauban ang mga miyembro sa 10th Sangguniang Panlungsod, City Spokesperson ug Consultant Jun Galario, mga department heads ug empleyado sa kagamhanang lokal, ingon man ang mga representante sa Bureau of Fire Protection (BFP), Philippine National Police (PNP), ug Philippine Army, nga nagpakita sa ilang suporta sa mga programa ug inisyatiba sa siyudad.
Usa sa mga nag-unang highlight sa maong convocation mao ang pormal nga pagbindisyon sa mga bag-ong sakyanan ug heavy equipment sa kagamhanang lokal, lakip ang usa ka pickup, usa ka SUV, lima ka utility van, ug usa ka motor grader.
Gilauman nga makatabang kini sa pagpalig-on ug pagpaspas sa paghatag sa serbisyo publiko, ilabi na sa mga programa sa imprastraktura, emergency response, ug operasyon sa nagkalain-laing mga buhatan sa siyudad.
Nagsugod ang kalihokan pinaagi sa usa ka Eucharistic Mass nga gisundan sa pormal nga programa. Mihatag sa opening remarks si City Councilor Cecile Mabao-Caballero, Chairperson sa Committee on Economic Enterprise.
Gipresentar usab sa CEEO ug CENRO ang ilang mga kalampusan, proyekto, ug mga programa nga nagpunting sa malungtarong kalamboan ug responsableng pagdumala sa kalikupan. Gihatagan usab og importansya ang kontribusyon sa mga kawani sa maong mga buhatan pinaagi sa mga intermission presentations atol sa programa.
Sa iyang mensahe, gipasiugda ni Mayor Galario ang kamahinungdanon sa dedikasyon sa serbisyo publiko ug ang pagbalanse sa kalamboan sa ekonomiya ug pag-atiman sa kinaiyahan aron mapadayon ang hapsay, luwas, ug progresibong pag-uswag sa siyudad.
Gihatagan usab og pag-ila ang mga retiradong kawani sa kagamhanan pinaagi sa Awarding of Retirement Pabaon isip pagpasalamat sa ilang dugay ug matinud-anong serbisyo sa publiko.
Gitapos ang programa pinaagi sa closing remarks ni City Councilor Rogelio P. Hera, Chairman sa Committee on Environment.
PIAD | Jay Fernandez-Ara
HOST | Ree Diarota
Photos | Carl Tradz & Kurt Tedlos