Mas paspas ug mas sayon na karon ang pagkuha og impormasyon sa mga opisina sa Lokal nga Panggamahanan sa Tagum human nahimong fully operational ang unom ka Interactive Kiosks nga nahimutang sulod sa Tagum City Hall. Davao del Norte.
Naghatag kini og direkta ug mahinungdanong akses sa Citizen’s Charter, detalye sa job applications, ug interactive maps nga maggiya sa publiko sa ilang tuyo nga opisina. Pinaagi niini, mas episyente ug mas mapadali ang pagkuha sa impormasyon gikan sa nagkalain-laing opisina ug serbisyo sa LGU-Tagum.
Kini nga inisyatiba gipangulohan sa City Information and Communications Technology Management Office (CICTMO) isip kabahin sa padayon nga tinguha sa syudad sa pagpalambo isip usa ka SMART City pinaagi sa digitalization, aron mahatagan ang publiko og mas de-kalidad ug mas accessible nga serbisyo.