Ang Bukidnon State University (BukSU), pinaagi sa Office of the Vice President for Culture, Arts, Sports, and Student Services (OVPCASSS), opisyal nga nagbukas sa unang Anlaw ta Binukid nga nagpakita sa LAMBAGA: A Testimonial Lecture niadtong Marso 24, 2026 sa BukSU Mini Theater, Malaybalay City, Bukidnon.
Naghatag og mensahe sila Dr. Lorenzo B. Dinlayan III, Direktor sa Student Leadership and Development Unit (SLEDUVU), ug Dr. Lincoln V. Tan, Vice President for Culture, Arts, Sports, and Student Services (OVPCASSS). Gipasiugda nila nga ang maong inisyatibo dili lang alang sa pagpreserba, kundili alang usab sa pagpadayon sa panulondon para sa umaabot nga mga henerasyon. Gisundan kini sa seremonyal nga pagtunol sa librong GALLI–Guide on Active Lumad Language Inculcation, nga gisulat ni Dr. Lorenzo B. Dinlayan III.
Si Dr. Joy M. Mirasol, Presidente sa unibersidad, midugang nga isip mga tigbantay sa panulondon, ang unibersidad nagpabilin nga komitado sa pagsiguro nga ang “AMUL” (panagtigum) sa katawhan padayon nga madungog, tahuron, ug ipaambit.
Lakip sa mga bisitang tigpamulong si Dr. Susan S. Olana, usa ka tigpanalipod sa kultura sa Bukidnon, nga miingon:
“Ang Binukid maoy pinulongan sa atong mga istorya, atong mga pag-ampo, atong katawa, ug sa atong adlaw-adlaw nga kinabuhi.”
Midugang pa siya:
“Adunay uban nga nagtuo nga ang pagsulti sa ilang lokal nga pinulongan makapugong sa ilang mga oportunidad. Apan, kanunay kong gin-ingnan ang akong mga kauban ug estudyante nga ang kahibalo sa imong pinulongan dili makapugong kanimo—hinuon, kini makapalig-on kanimo.”
Usab, si Datu Rodelio “Waway” Saway, usa ka iladong artista sa tibuok kalibutan gikan sa tribong Talaandig ug tigpanalipod sa kultura sa Bukidnon, mipaambit sa iyang mga kasinatian ug mihimo og pasundayag sa iyang sinulat ug nailhang mga kantang kultural.
Gipasiugdahan usab sa programa ang tulo ka Binukid cultural advocate vloggers—sila Mr. Arnel Cayaga, Mr. Rocky “Dakan” L. Ampo Jr., ug Ms. Lailyn Deskil—nga mipresentar og mga sulod ubos sa “Magkinanau ku hu Binukid” (Magkat-on ta og Binukid) ug mipaambit sa ilang adbokasiya, mga kasinatian, makapadasig nga istorya sa kinabuhi, ug ilang papel isip mga social media influencers sa pagpalambo sa Binukid nga pinulongan.
Isip kabahin sa inisyatibo, nagbutang usab og mga signage ug biswal nga materyales nga naggamit og yano nga mga ekspresyon sa Binukid sa palibot sa unibersidad. Ang selebrasyon nagpadayon gikan Marso 24 hangtod 26, 2026, nga nagpakita sa padayon nga paningkamot sa BukSU sa pagpreserba sa kultura ug aktibong pag-awhag sa komunidad sa pag-apil sa pagpasidungog, pagpalig-on, ug pagpadayon sa Binukid nga pinulongan, lumad nga panulondon, ug identidad alang sa umaabot nga mga henerasyon.
Mga pulong ni Denise Jea Delco
Mga hulagway nila Dan Jake Torres, Al-jelah Aclon, Kish Humphrey Razon, ug Denise Jea Delco
