Gikondena ni Police General Jose Melencio C Nartatez Jr., Chief, PNP, ang nahitabong madugoong ambush nga niresulta sa kamatayon sa lima ka pulis-mga alagad sa katawhan nga wala na nakapauli sa ilang mga pamilya.
Gi-ila ang mga namatay nga mga pulis nga sila Patrolman Kenneth Perocho, Patrolman Al-Fatah Marohom, Patrolman Amil Bangsa, Patrolman Arsenal Sivih, ug Patrolman Sayed Ridwan nga naka-assign sa 2nd Maguindanao del Sur Provincial Mobile Force Company.
Ang maong insidente, nagbilin ug dakong lungag sa kasingkasing sa kapulisan ug sa komunidad, gihulagway ni CPNP Nartatez Jr., isip usa ka “walay kalooy nga pag-atake” batok sa mga tawo nga nanumpa sa pagpanalipod sa kalinaw ug seguridad.
“Dili nato tugotan nga mapildi ang hustisya pinaagi sa kahadlok,” mensahe ni PGen Nartatez Jr., samtang gipadayag ang determinasyon sa PNP nga pangitaon ug papanubagon ang mga responsable sa maong pag-atake.
Sa likod sa uniporme, ang lima ka pulis adunay kaugalingong mga damgo, pamilya, ug mga plano sa kinabuhi—mga istoryang naputol tungod sa walay kaluoy nga pagpamusil. Ang ilang pagkawala dili masukod sa numero lamang, kundili sa kasakit nga gibati karon sa ilang mga minahal ug sa komunidad nga ilang gialagaran.
Samtang nagpadayon ang imbestigasyon sa PNP, ang panawagan alang sa hustisya nag-alingawngaw—usa ka pahinumdom nga sa taliwala sa kasakit, ang paglaum ug panaghiusa magpadayon sa pagbarug batok sa pagpanghasi ug pagpanghulga sa katawhan.