Nanumpa na si Police Colonel Peter B Madria., isip bag-ong City Director sa Davao City Police Office karung Lunes, Marso 30, 2026 sa Sandigan Hall, Davao City.
Ang maong seremonya gipangunahan ni Police Brigadier General Leon Victor Z. Rosete, Regional Director sa Police Regional Office 11, nga gihatagan ug Arrival Honors. Gibuhat pud ang pagpirma sa Guest Book, pagbasa sa termination ug designation orders, pagpirma sa Relinquishment ug Assumption of Office, ug ang simbolikong Turnover of Command ug Office Property Equipment Inventory Book—mga ritwal nga nagpasabot sa responsableng pagdawat ug paghatag sa katungdanan.
Lakip usab sa programa ang pagpasidungog kang Police Colonel Mannan C Muarip, Outgoing City Director, pinaagi sa mga award alang sa iyang dedikasyon, samtang ang bag-ong liderato giabiabi uban sa paglaum ug pagsalig.
Gihatagan usab ug mga token ug memento si Angel B. Sumagaysay, ang Guest of Honor and Speaker nga nagrepresentar kang Hon. Sebastian R. Duterte, Mayor, Davao City, isip pasalamat sa ilang bililhong suporta ug kontribusyon.
Labaw pa sa usa ka simpleng pag-ilis sa liderato, ang maong kalihokan naglarawan sa padayon nga panumpa sa serbisyo, disiplina, ug dedikasyon sa misyon sa pagmintinar sa kalinaw ug kahapsay sa Dakbayan sa Davao. Sa paglingkod ni PCol Madria isip bag-ong City Director, nagpadayon ang Davao City Police Office sa lakang nga may bag-ong direksyon ug lig-on nga pundasyon nga gitukod sa milabay nga liderato inubanan sa tabang ug kooperasyon sa katawhan sa Dabawenyo.
