Gipahigayon ang usa ka pagtuon nga may titulong “Presence of Schistosoma Infection in Barangay Kalasungay” niadtong Marso 13, 2026 sa Barangay Kalasungay aron masuta ang kahimtang sa schistosomiasis sa maong lugar.
Ang kalihokan gipangulohan nila Kharl Karen Libot, Apple Grace Doydoy, Joy Ruth Bernaldez, Menargie Matociño, Berlyn Tubio, ug Lorna Bansag, uban ang mga Human Resource for Health (HRH), Barangay Health Workers (BHW), ug mga medtech students gikan sa Liceo de Cagayan University.
Tumong sa pagtuon nga mahibal-an ang prevalence sa schistosomiasis sa barangay ug ikumpara ang kaepektibo sa Kato-Katz technique isip pamaagi sa pag-diagnose sa maong sakit.
Sumala sa resulta, mikabat sa 82 ka stool samples ang gisusi gamit ang maong pamaagi. Sa maong gidaghanon, lima (5) ang positibo sa schistosomiasis, usa (1) sa Ascaris, duha (2) sa Heterophytes, ug usa (1) sa Trichuris.
Human sa eksaminasyon, gihatagan dayon og tambal ang mga apektadong indibidwal. Gihatag ang Albendazole nga 400 mg, usa ka tableta matag adlaw sulod sa tulo ka adlaw, ug gisugo nga mobalik human sa duha ka semana alang sa repeat nga Kato-Katz test.
Gihatagan usab sila og Praziquantel nga 40 mg kada kilo sa timbang isip initial dose, ug gikinahanglan nga mobalik human sa unom ka semana alang sa ikaduhang treatment ug repeat nga eksaminasyon.
Ang maong inisyatibo kabahin sa padayon nga paningkamot sa panglawas aron mapugngan ug makontrol ang pagkatap sa schistosomiasis ug uban pang parasitikong sakit sa komunidad.
Sulat ni: Mhegan L. Dominguez, CHO-NADA