Padayon nga gihatag sa gobyerno ang fuel subsidy ngadto sa mga mag-uuma aron matabangan sila sa pagsaka sa presyo sa krudo nga nakaapekto sa ilang panginabuhian ug produksyon.
Pinaagi sa maong programa, ang mga benepisyaryo makadawat og fuel cards nga magamit sa pagpalit og krudo para sa ilang mga traktora ug water pump, aron mapadayon ang ilang mga buluhaton sa uma.
Sumala nila Lolito Japos ug Eleazer Dumdum sa Barangay Baobaoan, dako kaayo ang tabang sa subsidy ilabi na nga nagsalig sila sa makinarya sa ilang pagpanguma. Nakatabang kini aron dili maputol ang ilang operasyon ug mapadayon ang ilang kita.
Padayon usab nga palapdan sa gobyerno ang programa aron mas daghang mag-uuma ang matabangan ug masiguro ang igo nga suplay sa pagkaon sa komunidad.
Ang City Agriculture and Veterinary Department (CAVD) magahatag usab og mga sertipikasyon sa mga mag-uuma aron makagamit sila sa subsidy sa mga partner nga gasolinahan.
Source: Butuan City PIO