Dakop ang dose (12) ka indibidwal atol sa usa ka checkpoint operation nga gihimo sa kadlawon sa Abril 20, 2026 sa Duran, Parang, Maguindanao del Norte, isip kabahin sa kampanya batok sa smuggling ug paglapas sa Republic Act No. 10591.
Sumala sa report, mga alas 1:20 sa kadlawon dihang nagpatuman og intelligence-driven anti-criminality checkpoint ang nagkahiusang pwersa sa 3rd MP Platoon, 1401st RMFC, RMFB 14-A, Parang Municipal Police Station (MPS), TSC RMFB 14-A, ug PNP Maritime Group, inubanan sa koordinasyon sa RID BAR ug Bureau of Customs (BOC).
Atol sa operasyon, napahunong ang tulo ka sakyanan—usa ka silver nga mini van, pula nga Isuzu Elf, ug itom nga Toyota Fortuner—nga nakapundok og kapin 6,500 ka reams sa smuggled nga sigarilyo nga CANNON brand, nga gibanabana nga nagkantidad og Php 5,431,725.00. Nakumpiska usab ang usa ka caliber .45 Springfield Armory nga pistola.
Apil sa mga nadakpan ang drayber sa mini van nga si Jonada Alibaser Boga ug laing onse (11) ka indibidwal gikan sa nagkadaiyang lugar sa Lanao del Sur ug kasikbit nga mga lugar, lakip ang usa ka menor de edad nga 14 anyos.
Gihimo ang inventory sa mga nakuhang ebidensya atubangan ni Barangay Kagawad Ildefonso M. Santos Jr. sa Barangay Sarmiento aron masiguro ang transparency sa operasyon.
Gidala ang mga suspek uban sa mga nakumpiskang ebidensya sa Parang MPS alang sa dugang imbestigasyon ug hustong disposisyon. Gilauman usab nga ibalhin ang mga smuggled nga sigarilyo ngadto sa Sub-Port Parang sa Bureau of Customs alang sa dugang proseso.
Padayon ang imbestigasyon sa mga otoridad aron mailhan ang uban pang posibleng nalambigit sa ilegal nga kalihokan.
Source: StarFM Cotobato