CAGAYAN DE ORO CITY — Dali nga miresponde ang Quick Response Team (QRTeam) ubos sa pagpanguna ni 1st District Congressman Lordan Suan aron maghatag og hinabang sa mga biktima sa sunog sa Zone 2, Barangay Patag niadtong Sabado.
Mokabat sa 14 ka pamilya nga naglangkob og 59 ka indibidwal gikan sa pito ka panimalay ang naapektuhan human lamyon sa kalayo ang ilang mga balay niadtong Biyernes sa gabii.
Sumala kang 1st District Assistant Director Bert Amplayo, normal kini nga aksyon gikan sa kongresista aron masiguro nga matubag dayon ang pinakaunang panginahanglan sa iyang mga konstituwente nga nabiktima sa kalamidad. Gipahayag usab niya nga dako ang pasalamat nga walay nasamdan o namatay sa maong insidente.
Dugang pa, gisiguro ni Amplayo nga ang opisina ni Suan magpadayon sa paghatag og tabang gawas sa inisyal nga relief sama sa pagkaon ug batakang panginahanglan. Tabangan usab ang mga biktima sa pagproseso sa pinansyal nga asistensya aron makatabang sa ilang pagbangon gikan sa kasamtangang kalisod.
Samtang, gi-awhag usab ni Suan ang tanang Kagay-anon nga magpabiling alerto ug mabinantayon, ilabi na karong nagkaduol ang panahon sa El Niño nga mahimong magdala og mas init nga klima sa syudad.
Source: RMN DXCC CDO