Gitambungan sa mga pamilya ug kabanay ang Consultative meeting karong adlawa, Hunyo 30, 2026, alang sa pagahimuong mass exhumation o ang pagbalhin sa ‘human remains’ sa mga nalubong nga non-Muslim sa karaang sementeryo sa Bingcungan ngadto sa mas halapad ug hamugaway nga Busaon Public Cemetery.
Ang maong inisyatibo gipangunahan sa City Economic Enterprises Office (CEEO) sa Lokal nga Panggamhanan sa Tagum aron mapahibalo sa matag-pamilya ang proseso ug mga lakang nga pagasundon sa maong exhumation.
Dugang niini, gipasabot usab sa mga pamilya ang mga kinahanglanong dokumento, lakip na ang pagtubag sa mga pangutana sa mga tagtungod aron masiguro nga hapsay ug organisado ang pagahimuong mass exhumation karong umaabot nga Agosto 4, 2026.
Alang sa dugang kahibalo ug pangutana, mamahimo kamong muduol sa opisina sa CEEO nga nahimutang sa Tagum Public Market.
Sa mga kabanay nga adunay problema sa death certificate sa mga nalubong sa Bincungan Public Cemetery, mamahimo usab kamong mubisita sa City Registrar’s Office nga nahimutang sa ground floor sa Tagum City Hall.