Grabe nga samad ang naangkon sa usa ka 50-anyos nga lalaki human siya gitigbas sa gituohang suspek sa Purok 7, Brgy. Sinakulay, President Quirino, Sultan Kudarat pasado alas-2:00 sa kaadlawon niadtong Abril 17, 2026.
Ang biktima giila sa alyas Reynaldo, usa ka mag-uuma ug residente sa maong lugar. Sumala sa report, nakaangkon siya og lalom nga samad sa liog ug naputol ang iyang wala nga kamot tungod sa pananaga.
Sa imbestigasyon sa mga awtoridad, giila ang suspek nga alyas Kulot, mga 30 anyos, ulitawo, ug temporaryong nagpuyo usab sa lugar. Human sa insidente, dali siyang mikalagiw paingon sa wala pa matino nga direksyon.
Narekober sa dapit sa krimen ang naputol nga kamot sa biktima, samtang gidala dayon siya sa Sultan Kudarat Provincial Hospital aron matambalan dayon.
Sumala sa pulisya, nagpadayon ang hot pursuit operation sa mga operatiba aron masubay ug madakpan ang suspek, samtang nagpadayon usab ang imbestigasyon sa maong insidente.
Source: StarFM Cotobato