Matagumpayon nga naka-neutralisa ang hiniusang pwersa sa Philippine National Police (PNP) ug Philippine Army (PA) og napulo ka miyembro sa lokal nga Dawlah Islamiya–Maute Group (DI-MG), nga giila nga usa sa mga responsable sa 2017 Marawi City siege, niadtong Biyernes. Nahitabo kini human sa joint police-military operation sa Marantao, Lanao del Sur.
Sumala kang Police Captain Steffi Salanguit, tigpamaba sa Police Regional Office–Bangsamoro Autonomous Region (PRO-BAR), ang kapulisan uban sa mga sundalo gikan sa 1st Infantry Division (1st ID) PA magpatuman unta og mga warrant of arrest batok sa usa ka lider sa DI-MG sa Barangay Banga-Pantar tungod sa mga kaso nga murder, frustrated homicide, kidnapping, ug serious illegal detention, sa dihang gipusilan sila sa armadong grupo.
Miabot og usa ka oras ang engkwentro nga miresulta sa pagkamatay sa 10 ka mga suspek nga terorista, lakip ang upat ka babaye.
Gikilala sa pulisya ang mga napatay nga sila Amerol Mangoranca alyas Usman, lider sa nahibiling DI-MG; Fahmi Aminodin; Benjie Amir; Sohaile Borud; Jamal Ibrahim; Mohaimen Aragon; Nahara Khairiya Hamim (asawa ni Benjie); alyas Polindan (asawa ni Mangoranca); ug duha pa ka wala mailhing babaye.
Walay naitalang casualty sa panig sa pwersa sa gobyerno, apan adunay usa ka masuso nga narekober sa balay ni Usman ug karon gihatagan og hustong medikal nga pag-atiman.
Sa laing bahin, narekober usab sa mga operatiba sa encounter site ang lima ka high-powered firearms, usa ka hand grenade, ug pipila ka mga sangkap sa paghimo og bomba.
Dugang pa ni PCpt Salanguit, ang mga napatay nga miyembro sa DI-MG maoy mga pangunahing suspek sa pag-ambush sa tropa sa gobyerno niadtong Enero 23, 2026 sa Barangay Lininding, Munai, Lanao del Norte, diin upat ka sundalo ang namatay ug usa ang nasamdan.