Gipasabot sa Department of Social Welfare and Development sa Davao Region (DSWD-Davao) nga walay kamatuoran ang alegasyon nga ang P15,000 Seed Capital Fund (SCF) sa Sustainable Livelihood Program (SLP) sa Mati City, Davao Oriental gi-convert ngadto grocery vouchers.
Matod ni Regional Director Rhuelo D. Aradanas, klaro sa Memorandum Circular 03, series of 2025 nga ang pondo direktang ihatag sa benepisyaryo ug gamiton lamang para sa ilang microenterprise, dili para personal nga konsumo.
Gidugang niya nga walay direktiba ang DSWD nga i-convert ang cash ngadto voucher o magtalaga og grocery store. Kung adunay ingon nga hitabo, kini dili awtorisado ug wala gikan sa ahensya.
Gipahayag usab ni Aradanas nga andam silang mag-validate ug mag-monitor aron masiguro ang hustong paggamit sa pondo, apan wala pa silay gilunsad nga imbestigasyon tungod kay walay pormal nga reklamo.
Gihagit niya ang mga apektadong benepisyaryo nga mosang-at og reklamo aron matabangan ug mahatagan og libreng legal nga serbisyo.
Ang kontrobersiya misiklab human sa viral nga social media post nga nag-angkon nga giilisan og grocery coupons ang SCF nga gihatag sa kapin 900 ka benepisyaryo sa Mati City.
Source: Sun Star Publishing