Dismayado ang mga lehitimong taxi drivers sa Cagayan de Oro human mikabat lamang sa P1,500 ang ilang nadawat nga fuel subsidy gikan sa gobyerno, imbes nga ang gisaad nga P5,000.
Gawas sa kakuwang sa ayuda, hugot usab nilang gireklamo ang naghitak nga operasyon sa mga ‘kulorom’ nga van ug luxury cars nga nagbiyahe paingon sa Davao bisan walay saktong prangkisa.
Namatikdan usab ang pagdaghan sa mga illegal nga tricab ug motorrela nga nag-atang sa mga highway ug palibot sa mga mall, butang nga dako og epekto sa ilang inadlaw-adlaw nga kita.
Tungod niini, nanawagan ang mga drayber sa Committee on Public Utilities nga hatagan og dinaliang aksyon ang ilang mulo aron maprotektahan ang ilang panginabuhian. Hugot karon ang ilang hangyo sa LTO, ug RTA nga seryosohon ang pagpanakop sa mga illegal nga biyahero aron mahatagan og hustisya ang mga driver nga legal nga nagbayad og buhis ug prangkisa.
Source: Bombo Radyo CDO