Nasawi ang usa ka 14-anyos nga estudyante samtang usa pa ka indibidwal ang nasamdan human sa usa ka trahedyang aksidente sa dalan nga nahitabo bandang alas-1:10 sa hapon niadtong Abril 19, 2026 sa Sultan Kudarat, Maguindanao del Norte.
Sumala sa report sa Sultan Kudarat Municipal Police Station, nahitabo ang insidente sa bahin sa Davao–Cotabato Road sa Barangay Pigcalagan, Km 14.
Gikilala ang driver sa sakyanan sa alyas “Mtato,” 21 anyos, residente sa maong lugar, nga nagmaneho sa usa ka puti nga ten-wheeler mixer truck nga walay plaka. Nakaangkon usab siya og mga samad tungod sa aksidente.
Dead on the spot ang pasahero nga si alyas “Fahad,” 14 anyos, usa ka estudyante ug residente sa Barangay Pigcalagan.
Nasamdan usab ang usa ka bystander nga si alyas “Jerick,” 37 anyos.
Base sa inisyal nga imbestigasyon sa pulisya, padulong unta sa northbound ang truck gikan sa Crossing Simuay apan nakabsan og kontrol samtang naglabay sa kurbadang bahin sa dalan.
Gituohang posibleng kusog ang dagan sa sakyanan hinungdan nga misadsad kini ngadto sa residential area ug natandog ang bystander.
Dali nga gidala sa Cotabato Regional and Medical Center ang driver ug ang nasamdan nga biktima aron matambalan.
Human sa insidente, gidala ang sakyanan sa police station alang sa dugang imbestigasyon ug hustong disposisyon.
Padayon pa ang imbestigasyon sa mga awtoridad aron matino ang tibuok kahimtangan sa maong aksidente.
Source: StarFM Cotobato