Malampusong gipahigayon ang Pasundayag Kaamulan Festival 2026, niadtong Abril 28 sa Robinsons Valencia City, Bukidnon pinaagi sa pagpanguna sa Robinsons Valencia uban sa pakigtambayayong sa Valencia City Youth Development Office, City Tourism and Cultural Affairs Division, ug sa Indigenous Peoples Mandatory Representative (IPMR).
Gipasidunggan sa maong kalihokan ang kultura ug tradisyon sa mga tribung Bukidnon, Manobo, ug Talaandig pinaagi sa “PAMANA” Cultural Fashion Show, usa ka pagpasundayag sa mabulukong kabilin sa kagikan ug pagpakita sa identidad nga naghulma sa kultura, tradisyon, ug pagkausa isip komunidad.
Nahimong mas mabulokon ang programa pinaagi sa mga pasundayag sa Artifex Indak Dance Troupe ug sa singer-composer nga si Aenn Charelle Valde Cuyag, nga nakahatag og kadasig sa mga tumatan-aw.
Naghatag usab og makapadasig nga mensahe sila Bae Irene Pandian, IP Mandatory Representative, ug Leonor Mandawe, City Tourism Officer, nga nagpasiugda sa papel sa kabatan-onan sa pagpreserba sa lumadnong kinaadman.
Sa panapos, gihatagan og pag-ila ang mga artist, modelo, ug cultural advocates nga nahimong kabahin sa kalampusan sa maong kalihokan.
Gihatagan usab og mga sertipiko ang mga partisipante sa Kaamulan Mural Exhibition ug ang Amul Amul Hu Bukidnon Artists isip pagpasidungog sa ilang kontribusyon sa mamugnaong kabilin sa probinsya. Natapos ang programa pinaagi sa commemorative photo session isip simbolo sa hiniusang paningkamot sa pagpalambo sa kultura sa komunidad.
PIAD | Jessa Heroche
Photos: Mhai Alojepan & VCYDO