Gipasiugda ang kultura ug tradisyon sa mga Blaan atol sa pagsaulog sa 12th Blaan Day, nga gipahiusa sa 68th Barangay Foundation Anniversary ug Kaflehew Festival 2026 sa Barangay Landan, Municipality of Polomolok, South Cotabato niadtong Agosto 9, 2026.
Ang selebrasyon nagdala sa tema nga “Celebrating Blaan Heritage: Unity, Culture, and Sustainable Progress,” diin nagtigom ang mga lokal nga opisyal, tribal leaders, mga representante sa gobyerno, mga magtutudlo ug nagkalain-laing community stakeholders.
Mitambong sa maong kalihokan si PCOL ARGEL N. ANCHETA, Officer-in-Charge sa South Cotabato Police Provincial Office, isip representante ni PBGEN ALAN B. MANIBOG, Regional Director sa Police Regional Office 12.
Sa iyang mensahe, gipasiugda ni PCol Ancheta ang kamahinungdanon sa pagpasigarbo sa kultura, tradisyon ug identidad sa mga Blaan. Matod niya, dili lamang sulod sa ilang komunidad angay mailhan ang ilang dato nga kabilin, kondili angay usab kini ipakita ug ipaambit ngadto sa mas daghang tawo.
Gidasig niya ang mga Blaan nga padayon nga amumahan, praktison ug mapasigarbohon ang ilang talagsaong kultura ug tradisyon aron kini mailhan ug mapasalamatan dili lamang sa Pilipinas, kondili bisan pa sa nagkalain-laing bahin sa kalibotan.
Nahimong mahinungdanong plataporma ang 12th Blaan Day alang sa pagpasidungog ug pagpalambo sa dato nga cultural heritage, identidad, tradisyon ug mga kontribusyon sa mga Blaan sa katilingban.
Gipakita usab sa maong selebrasyon ang kamahinungdanon sa panaghiusa, cultural pride ug aktibong partisipasyon sa komunidad pinaagi sa panagtambayayong sa Indigenous Peoples, lokal nga pangagamhanan, mga ahensya sa gobyerno ug nagkalain-laing stakeholders.
Sa maong higayon, gipasalig pag-usab sa SCPPO ang padayon nga paningkamot sa pagpalig-on sa police-community partnership, pagsuporta sa Indigenous Peoples, pagrespeto ug pagpanalipod sa cultural heritage, ug pagpalambo sa malinawon ug luwas nga palibot diin ang mga komunidad sa Blaan makapadayon sa ilang tradisyon ug makauswag.