Malampusong napahigayon ang “Summer Remedial and Tutorial Class Culmination Day” isip kabahin sa pagpalig-on sa edukasyon ug katibuk-ang pag-atiman sa kabataan sa Dakbayan sa Valencia niadtong Mayo 7, 2026 sa Valencia City Covered Court, City Hall Compound, Valencia, Bukidnon uban ang kooperasyon sa lokal nga pangagamhanan ug sa Panlibatuhan Women’s Organization.
Tumong niini ang paghatag og dugang nga kahibalo ug akademikong suporta ngadto sa mga kabataan pinaagi sa remedial ug tutorial classes atol sa summer break.
Kabahin sa kalihokan ang paghatag og pag-ila sa mga partisipante, mga boluntaryong magtutudlo, ug mga organisasyon nga mipasiugda sa maong programa. Gipasiugda usab dinhi ang importansya sa padayon nga pagkat-on isip pundasyon sa mas lig-on ug mas maayong kaugmaon alang sa kabataan.
Ang maong inisyatiba kabahin sa mas lapad nga paningkamot sa lokal nga pangagamhanan ubos sa liderato ni Mayor Amie Galario, kauban ang 10th Sangguniang Panlungsod sa pagpangulo ni Vice Mayor Greizl Galario-Fernandez, sa pagpalambo sa kalidad sa edukasyon ug paghatag og pantay nga oportunidad sa pagkat-on alang sa tanang kabataan, ilabi na kadtong nanginahanglan og dugang nga giya sa akademiko.
PIAD | Jay Fernandez-Ara
Photos: Carl Tradz