Gipakita sa mga kawani sa City Mayor’s Office (CMO) Admin, CMO Medical Assistance Office, ug Bids and Awards Committee (BAC) Office ang tinuod nga diwa sa panaghiusa ug pagtinabangay pinaagi sa gipahigayon nga “OPLAN KALINIS” niadtong Mayo 8, 2026 sa Valencia City, Bukidnon.
Ubos sa direktiba ni Mayor Amie Galario, aktibong miapil ang tanang empleyado—Job Order, Casual, ug Regular—sa paglimpyo ug pagmentinar sa kalimpyo sulod sa City Hall compound. Kabahin kini sa padayon nga programa sa administrasyon aron masiguro ang hapsay, luwas, ug desente nga palibot alang sa publiko ug sa mga kawani sa gobyerno.
Labaw pa sa usa ka ordinaryong pagpanghinlo, ang maong kalihokan usa ka pagpamatuod nga ang serbisyo publiko nagsugod sa disiplina sa kaugalingon. Gipakita niini nga walay pinili nga posisyon sa pag-alagad—mapa-Regular man, Casual, o Job Order—tungod kay ang matag kawani adunay responsibilidad sa pag-atiman sa komunidad ug sa pampublikong pasilidad.
Pinaagi sa panaghiusa ug kooperasyon sa mga kawani, napamatud-an nga ang bisan bug-at nga buluhaton mahimong gaan kon adunay hiniusang paningkamot. Ang usa ka limpyo ug organisadong palibot nagpakita usab sa sinseridad ug dedikasyon sa mga kawani sa paghatag og episyente ug maayong serbisyo ngadto sa matag Valenciano.
Pinaagi niining Oplan Kalinis, padayon nga gidasig sa lokal nga pangagamhanan ubos sa liderato ni Mayor Amie Galario, kauban ang 10th Sangguniang Panlungsod sa pagpangulo ni Vice Mayor Greizl Galario-Fernandez, ang paghimong adlaw-adlaw nga batasan sa pagmentinar sa kalimpyo ug kahapsay sa palibot. Kini usa ka konkretong ehemplo nga ang positibong kausaban magsugod sa ginagmay apan makahulugang lakang nga adunay dakong epekto sa panglawas, kalikupan, ug kaayohan sa komunidad.
Ang LGU Valencia magpadayon nga mahimong ehemplo sa maayong panggamhanan—dili lamang pinaagi sa dagkong proyekto, kondili usab sa yano apan mahinungdanong paagi sa pag-amuma sa kinaiyahan ug komunidad.
PIAD| Jay Fernandez-Ara
Photos: Malou Manlapaz