Patay sa pagpamusil ang usa ka media personality sa wala pa mailhing mga suspek sa Sitio Proper 1 duol sa Barangay Hall sa Fort Pikit, Malidegao, Bangsamoro Autonomous Region in Muslim Mindanao kagahapon, Huwebes, Mayo 21, 2026.
Gi-ila ang namatay nga si Nestor M. Micator.
Nahibal-an nga kauban ang iyang asawa nga si Ruvy Micator, atol sa maong insidente sa pagpamusil. Sakay sa motorsiklo ang magtiayon human mamalit og pagkaon sa Poblacion, Pikit, Cotabato.
Ug kalit lang kini gihunongan sa mga suspek nga riding-in-tandem ug gipusil ang biktima nga naigo sa ulo nga mao ang rason sa hinanaling kamatayon.
Nahitabo ang pagpamusil mga 50 metros gikan sa balay sa mga biktima.
Nakarekober ang usa ka basiyo sa bala nga gituohang gikan sa kalibre .45 nga pistola samtang padayon ang lalom nga imbestigasyon sa PNP aron mailhan ang mga responsable ug matino ang motibo sa krimen.