Malampusong gipahigayon ang Teenage Pregnancy ug HIV Awareness Seminar ingon man TB Caravan diin nagtigom ang mga kabatan-onan, opisyal sa barangay, health workers, ug mga residente niadtong Mayo 18, 2026 sa Barangay 9 Gymnasium, Malaybalay City, Bukidnon.
Ang maong kalihokan gimugna aron mapalambo ug mapalig-on ang kampanya sa komunidad batok sa teenage pregnancy, HIV ug TB prevention pinaagi sa paghatag ug edukasyon, counseling, ingon man, pagdasig usab sa mga kabatan-onan sa responsableng pagdesisyon, ug pagpalambo sa himsog nga panginabuhi. Gilauman usab nga pinaagi sa maong programa mas molig-on ang partisipasyon sa komunidad sa mga health promotion programs sa barangay.
Lakip nga gihimo atol sa seminar ang HIV counseling and testing ug syphilis awareness aron mas mapadali ang paghatag og impormasyon ug serbisyo sa mga residente.
Nanguna sa maong kalihokan si Punong Barangay Dexter Maxileo P. Gamo ug Kag. OnHealth Ansawie P. Macadaag, uban sa suporta sa Sangguniang Kabataan Council sa barangay 9, mga health workers, ug mga youth leaders.
Mitambong usab ang mga representante gikan sa City Health Office (CHO) ug Provincial Health Office (PHO) nga naghatag og lecture ug health services. Lakip kanila sila si Marlon John T. Yongco, Fritzie Talatala, Demitrio T. Regidor Jr., Joseph Marben D. Gealon, ug uban pang health personnel nga mitabang sa paghatag og kahibalo sa mga partisipante.
Nagpasalamat ang mga opisyal sa tanang miapil ug misuporta sa maong kalihokan, ilabi na sa mga kabatan-onan nga aktibong naminaw sa mga diskusyon ug educational sessions alang sa mas luwas ug mas himsog nga komunidad.
Report: Mhegan L. Dominguz, CHO-NADA