Nadakpan ang upat ka tawo nga giingong nalambigit sa ilegal nga droga human mabungkag sa mga awtoridad ang usa ka drug den atol sa buy-bust operation sa Barrio Site, Barangay Mirab, Upi, Maguindanao del Norte niadtong Mayo 21, 2026.
Gipangulohan sa PDEA Maguindanao del Norte Provincial Office ang operasyon uban sa 1st Provincial Mobile Force Company sa Maguindanao del Norte Police Provincial Office, Regional Intelligence Unit 15, PNP Drug Enforcement Group Special Operations Unit 15, ug Upi Municipal Police Station.
Nasikop sa mga operatiba ang 17 ka heat-sealed transparent plastic sachets nga adunay gidudahang shabu nga adunay gibana-banang gibug-aton nga 25 gramos ug standard value nga mokabat og Php170,000. Narekober usab ang duha ka cellphone, nagkadaiyang drug paraphernalia, ug upat ka identification cards.
Gila ang mga nadakpang suspek sa mga alyas nga “Aisa,” 43 anyos ug giingong maintainer sa drug den; “Ulan,” 56 anyos; “Michael,” 51 anyos; ug “Tato,” 35 anyos. Ang tanang suspek residente sa Datu Odin Sinsuat, Maguindanao.
Nag-atubang karon ang mga suspek og kaso tungod sa paglapas sa Sections 5, 6, 7, 11, ug 12 sa Republic Act 9165 o ang Comprehensive Dangerous Drugs Act of 2002.
Matod sa mga awtoridad, ang malampusong operasyon nagpakita sa padayon ug mas gipakusog nga kampanya batok sa ilegal nga droga aron masiguro ang kalinaw ug kaluwasan sa komunidad.
Source: StarFM Cotabato